سەردار ھێتوتی

 

ب تنێ دگەل هاتنا دەستپێکا وەرزێ بهارێ، هند ژ ناڤەندێن حکومی و حزبی و ڕێکخراوێن جڤاکێ سڤیل و د پال ڤان دا ژی ڕێکخراوێن ژینگەهـ پارێزیێ ل کوردستانێ دەست ب هەوێن چاندنا دارا دکەن و وەک ئەرکەکی ل هەمبەر پاراستنا ڤی وەڵاتی د نرخینن. ئەو ب قات و بوینباخ ڤە ل هەمبەری چاڤکێن کامیرێن ڕۆژنامەڤانان د ڕاوەستن و دەستێ خۆ یێ پیرۆز و موبارەک دهاڤێژنە گوهێن شتلەکا کاژێ و چاڤێ وان ل کامیرێ یە و ب گرنژینەکا هشکڤە وەسا یێ د هزرێ دا یێ پاشەڕۆژا ڤی وەڵاتی ژ نەهامەتیێن پیسبوونا ژینگەهێ دپارێزن.

دگەل کو ژ دل سوپاسدارێن وانین کو هەر چ نەبیت یێ وی شتلێ دارێ ژی دچینن لێ ل سەر ملێ وان تنێ چاندنە و سەخبێری ژی خەما هڕوبا و ڕەحما مروڤێن بێ دلۆڤانە.

فەرە ئەڤ کارێن چاڤلێکرنێ بهێنە گوهرین و سیستەمەکێ ڕێکخستی ب خۆڤە بگریت و هەوا دار چاندنێ ب تنێ ب هاتنا بهارێ ڤە یا گرێدای نەبیت و هەمی دەم سالێن کو بکێر دهێن دار بهێنە چاندن ئەو ژی ب هشیاریا جڤاکی کو ساڵانە ب ملیونان دار بن نەکە چەند بنەکێن کێم بن، لەوما دبێژم:

1.بەری دار چاندنێ، مرۆڤی هشیار بکەن و جڤاکی بێخنە ل سەر هێلا پاراستنا ژینگەهێ.

2.ژینگەهـ پارێزی ب بەرفرەهی ببیتە کار و ئەرکێ حکومەتێ و ساڵانە بودچەیەکێ باش بۆ بهێتە تەرخان کرن.

3.وانێن ژینگەهپارێزیێ بکەڤنە د ناڤا پرۆگرامێن خاندنێ دا هەر ل باخچێن زارۆکان هەتا دگەهیتە زانینگەهێ.

4.دارستنا خۆزایی بهێتە پاراستن و دیر بیت ژ دەستدرێژیا خەلکی، ب هەر بەهانەکێ بیت.

5.ساڵانە ملیون داران بچینن و پاشان سەخبێر بکەن دا کو دەمەکێ کێم دا خەمل وەک بەر لێبهێت.

6.وان شتلان بچینن یێن کو دگەل خۆزایێ کوردستانێ دگونجن و زێدە پێدڤی ب ئاڤ و ئاڤدانێ نەبیت و دەما دسوزن ژی دووبارە ل سەر رهێن خۆ شین ببن وەک دارا بەریێ.