ژینگەهـ و کارڤەدانا وێ ل سەر ژیانا مرۆڤی

سەردار هێتوتی

ژینگەهـ، ناڤەندا پێدانا خارن و ڤەخارن و هەوایە بۆ مرۆڤاتیێ، واتە بێی ژینگەهـ قەت ژیان بەردەوم نابیت. لکوردستانێ، ژینگەهەکا خۆرستی هەیە و گشت چیا پر بوون ژ دارێن خۆرستی و ببوو سەدەمێ هندێ کو مروڤێ کورد ل کەڤندا پشت گەرمێ ژینگەها خۆ بیت و بو نانێ ڕۆژێ نەکەڤیتە ژێر لنگێ نەیاران. ژینگەهێ خارن ددا ڤی گەلی و د گەلەک قوناغان دا ژی ئەو ژ هێرشان پاراستینە، لەوا کورد قەرزدارێن ژینگەها خونە. لێ دەمەکە ب هێجەتا هەبوونا نیڤ موچەیەکی خەلکی پشت دایە پاراستنا ژینگەهێ و ژ هەبوونا دەلیڤا نەبوونا چاڤدێریێ و نەدانا پێدڤیێن ژیانێ بۆ گەرمکرنێ هندەک کالفامان دەست ب تاڵانکرنا ژینگەها وەڵاتی کرینە، هەنە گیانەوەرێن کویڤی دکوژن و ژ بۆ مەرەمێن ب دەستڤەئینانا پارەی وان ل بازارێن ڕەش دفرۆش هەر چەندە حکومەت فروشیار و بکران ژی ناسدکەت لێ شیانێن گرتنا وان نینە و ژ ئالیەکێ دیترڤە هەنە ب بەهانە نەدانا گازا سپی یا ماڵان دارێن ژینگەهێ برینە و ئەڤڕۆ ئەگەر بخازی گەریانێ ل چیا بکەی دێ بینی هەتا گوپیتکا چیا دارەک نینە ل ژێر سیبەرا وێ ڤەحەوی. لەوا نابیت خەلک ژی بکەڤیتە د ناڤا ئالیێ تەرازویا بێ خەمیا حکومەتێ دا و ژ بەر هەر ئەگەرەکێ بیت ژینگەها وەڵاتی تێکدەت، بەروڤاژی دڤێت ب ڕێکێن یاسای داخازا مافێن خۆ ژ حکومەتێ بکەن و د هەمان دەمدا ژی ببنە پارێزڤانێن هەبوونا ژیانا مروڤاتیێ واتە ژینگەهێ.