سەردار هێتوتی
کوردستان و عیراق، یێن کەفتینە د ناڤا مەترسیا چێبوونا بیابانێن نوو، ژێدەرێن ئاڤێ ل ڤان هەر دوو وەڵاتان د کێمیێ دایە و رابوونا تۆزێ بویە دیاردە و گەلەک کەڤنارە دەریاچکە ل عیراقێ یێن هشک بووی. کوردستان دوو جاران ل ژێر مەترسیا چێبوونا بیابانی دایە، یا ئێکێ دیاردا نوکە یا تۆز رابوون و کێم ئاڤیێ یە و مەترسیا دوویێ نەبوونا چ دەرووکانە بۆ گەهشتنا ڤی وەڵاتی ب زەریایان. لەورا دڤێت د سەری دا هەر دوو حکومەتێن ناڤەند و هەرێمێ ب بەرنامەکێ دارێژتی و دیر ژ فێلبازیێ و دەرووکێن دزیێ کار لسەر پلانەکا پێنج ساڵی بکەن و دەست بدەن کەسککرنا وەڵاتی و د پلانا خۆ دا دەستپێکێ ژ ناڤەندێن خاندنێ بدەنە دەستپێکرن و گشت قوتابی و فێرخازان پشکدار بکەن و ب هەفتیا کەسککرنا وەڵاتی بناڤ بکەن و هەر قوتابی زێدەتری 100 شتڵێن دارا بچینیت و پاشان تەخێن دیتر یێن جڤاکی پشکدار بکەن و د ناڤا ڤان ساڵان دا ب ملیونان داران بچینن و دڤێت حکومەت شتلێن بکێر هاتی و لگورەی سەقایێ هەر دەڤەرەکێ دابین بکەت. هەروەسا د ڤان ساڵان دا بێ ڕاوەستان یا فەرە بەنداڤێن بچیک و مەزن لسەر ریبارێن کوردستان و عیراقێ بهێنە ئاڤاکرن و ب ڕێکا بەرنامێن تیڤیان ڕەوشەنبیریا پاراستنا ئاڤێ د ناڤا خەلکی دا بهێتە بەڵاڤکرن. ژ بلی ڤان کارێن فەرە، لسەر حکومەتێن ناڤەند و هەرێمێ و ب تایبەت یا هەرێمێ فەرە کو پێدڤیێن دەمساڵا زڤستانێ بۆ خەلکی بهێنە دابینکرنا دا کو ژ نەچاری خەلک قەستا برین و تێکدانا دارستانان نەکەن بۆ مەرەمێن خۆ گەرمکرن. ئەگەر ڕێک ل هەمبەر هشکەساڵیێ و بیابانێن نوو و تۆربارینێ نەهێتە گرتن د دەمەکێ نێزیک دا دێ مەترسیێن دابینکرنا خارنێ ژی ل عیراق و کوردستانێ پەیدا بن و دێ گەلێ ڤی وەڵاتی کەڤیتە ژێر مەترسیێن ساخلەمیێ ژی.
