ژیان یاسین
بهایێ مروڤى چیە ؟ ئەرێ بهایێ مروڤى ئەوە کو ب ئازادى بژیت ، مافێن خو بپارێزیت و بێى ترس دەنگێ خو بلندبکەتن ، یان ژى ئەوە کو لبن سیبەرا دەستهەلاتەکێ گەندەل دا بێدەنگ بیت و هزربکەت زولم و تەپەسەری چارەنڤیسێ ویە ؟
حەنا ئارێنت فەیلەسوفەکێ سیاسیە دبێژیت ، دەستەلاتدارێ دکتاتور بتنێ لدویڤ وێ چەندێ نینە کو حوکمداریێ بکەت ، بەلکو دڤێت کەرامەتا مروڤا بنپێبکەت ! هەڤرامان دگەل گوتنا فەیلەسوفێ فرەنسى جان جاک روسو دەمێ د پەیمانا کومەلایەتى دادبێژێت ( مروڤ ب ئازادى ژدایک دبیت بەلێ هەمى جها دناڤ کوت و زنجیرادایە ، ل وەلاتێن گەندەل دا دەمێ تاکەکەس ژ ترسا کونجا زیندانێ و پاریێ نانێ خو بێدەنگ دبیت و فێردبیتە بارودوخەکێ گران وبێ دادیێ دا و ئێدى هەست ب زولمێ ناکەت ، لڤێرە پسیارەکا مەزن ئاراستەى جڤاکى دبیت ، ئەرێ مروڤى مافێن خو ژدەست داینە یان سیستەمى وەلێکریە ژ داخازکرنا مافێن خو بترسیت . چونکى دەمێ دادپەروەریا کومەلایەتى نەبیت یاسا دبیتە ئامرازێ زولمێ
ئەرێ کەرامەتا مروڤى بهادارترە یان پارچە قوماشەک کو دبێژنێ ئالایێ وەلاتى ؟ ئالا نیشانا ئاخێ ، دیروک ، ناسنامە و خەباتا مللەتى یە ، بەلێ ئەگەر ئەو ئالایە لسسەر بانێ ئاڤاهیەکێ بیت کو مافێ خەلکى بنپێدکەتن و ب ترسێ و برسێ خەلکى رێڤەدبەت ئەرێ ما چێدبیت شانازیێ ب وى ئالاى ببەى بێى کو پسیارەکێ ژخو بکەى ؟ رێزگرتن ل ئالایى نابیت ببیتە هێجەتەک بو بێرێزیکرنێ ب تاکێ جڤاکى . چونکى بهایێ وەلاتى د رەنگێن ئالایى دا نینە بەروڤاژى د ئازادى ، دادپەروەرى و کەرامەتا مروڤێ ڤى وەلاتى دایە .ئەرێ ستەمکارا بها ژ مروڤ وەرگرتیە یان خەلک ب بێدەنگى رادەستى ستەمکارابوینە و دەفخوشیێ بودکەن و دەستابودقوتن ؟ ئایا مانە خەلک وێ ژینگەهێ چێدکەن ئەوا مروڤى هیچ کەرامەتەک تێدانەمینیت و دبیتە کویلەکێ سەردەمیانە ، ئەرێ نەخوێندەوارى ، هوشیاریا سیاسى و جڤاکى و راهاتن ژ زولما دەستهەلاتیە وەدکەت خەلک دەستابقوتن شوینا داخازا مافێ خوبکەن ؟بەشەک ژ خەلکى لبن گڤاشتنا دەستادقوتن و هندەک ژى بو بەرژەوەندیاخو ، دڤێت خەلک پێداچونێ بکەتن و وێ بەرپرسیارەتیێ هەلگریت ئەوا کو ئالایێ وەلاتى لسەر خو بهادارترکرى چونکى نابیت چ ئالا ژ بهایێ مروڤى بلندتربن.
زالم ب هێزێ و ترساندنێ زولمێ دکەتن ، بەلێ زولم ژى هەتا هنگى یا بەردەوامە هندى سیستەم بێدەنگیێ بەرهەم دئینیت و دەستقوتان جهێ هشیاریێ و بەرپرسیارەتیا مەدەنى بگریت . یا من دڤێت بێژم ئەوە ئایا مروڤێ ترسنوک ئەڤ دەستەلاتەچێکریە یان دەستەلات بویە کارگەها چێکرنا ترسنوکان ؟ ئایا ئالا بهادارترە یان ئەو مروڤێن برسى و رویس و پێخاس ل نانێ ژیانێ دگەرن وەکى لێبوکا ؟
