سه‌ردار هێتوتى
ئابوور د سه‌رده‌مێ جیهانگێریێ دا د ناڤا ململانه‌كا دژوار دایه و هه‌ڤركیان توخیبێن وه‌ڵاتان به‌زاندینه و وه‌ڵاتێن زلهێز شیاینه ده‌ست داننه سه‌ر ناڤه‌ندێن بریارێ یێن وه‌ڵاتێن سیبه‌ر و دیڤه‌لانك و به‌رژه‌وه‌ندا خۆ یا ئابوورى ل وان وه‌ڵاتان بنه‌جهـ بكه‌ن، هه‌روه‌سا ڤان وه‌ڵاتێن زلهێز ژ بۆ به‌رژه‌وه‌ندێن خۆ یێن ئابوورى، هه‌ر چه‌ند د ئاستێ سیاسى دا ژى یه‌ك بریار و هزر نه‌بن لێ ژ به‌ر گڕانیا سه‌نگا بهایێ ئابوورى عه‌رد و شیانێن مرۆڤى یێن وه‌ڵاتێن خۆ دووباره ئێخستینه د ناڤا خزمه‌تا ئێك دا ژ به‌ر بهابوونا ده‌ستێ كارى ل جهه‌كى و نه‌بوونا ده‌لیڤێن كارى ل وه‌ڵاته‌كێ دیتر (وه‌كى كارێ كۆمپانیێن ئه‌مریكى ل وه‌ڵاتێ چینێ چونكى ده‌ستێ كارى ل ئه‌مریكا بهایه‌كێ گران دڤێت و ده‌لیڤێن كارى ژى ل چینێ زێده د به‌ر ده‌ست نینه) ئه‌ڤ وه‌ڵات نه‌چارى ڤى كارى كرییه.
ئابوورا بهێز و بنه‌جهـ و خۆرستى ئه‌وه یا كو ل پال بهایێ سه‌نگا ئابوورى، بها ل سه‌ر پاراستنا ژینگه‌هێ ژى هه‌بیت و نه‌بیته ئه‌گه‌ر ژ بۆ تێكدانا ژینگه‌ها مرۆڤاتیێ. پاراستنا ژینگه‌هێ دڤێت د پلان و ستراتیژیه‌ت و سیاسه‌تێن گرێداى پلاندانانا باژێران و چاندنێ و پیشه‌سازیێ و ڤه‌گوهاستنێ و هه‌ڵبژارتنا ته‌كنۆلوژیایێ دا هه‌بیت دا كو دگه‌ل ئاڤاكرنا ئابوورا بنه‌جهـ ژینگه‌هه‌كا پاقژ ژى بكه‌ڤیته د خزمه‌تا مرۆڤى دا.
لێ ڤان وه‌ڵاتێن زلهێز هه‌موو شیانێن مرۆڤى، ئاڤێ، ئاخێ و ژێده‌رێن سروشتى بكار دئینن ب تنێ ژ به‌ر به‌رژه‌وه‌ندێن دراڤى و چ گرنگیه‌كێ ب پاراستنا ژینگه‌هێ ناده‌ن.
دگه‌ل كو ئابوورا بربرا مانه‌ڤه‌یا مرۆڤاتیێ یه ل سه‌ر عه‌ردى، لێ د هه‌مان ده‌م دا ژینگه‌هـ ژى هه‌بوونا هه‌لمژینا وى هه‌واییه یێ مرۆڤ ژ بۆ هه‌ناسه‌دانێ بكار دبه‌ت له‌ورا یا فه‌ره كو ل سه‌ر ئاستێ گشت وه‌ڵاتان گرنگى ب پاراستنا ژینگه‌هێ بهێته دان
ژینگه‌هـ ل ژێر گه‌فێن ململانا ئابوورى
