ژیان یاسین
سالەک پتر دەربازبو لسەر هەلبژارتنێن پەرلەمانێ کوردستانێ و هەتانوکە هێزولایەنێن کوردى نەشیاینە چپکەک ژ دەریایا سوزێن داینە مللەتى بجهبینن ، بەروڤاژى بوینە بارگرانى بوسەر خەلکى ، مەبەستامن ژ گوتنا نیکولا ماکیاڤێللى ئەوا دبێژیت پاراستنا دەولەتێ ب گوتنا نابیت ئەوە کو ئەز بێژم وەلاتەکێ ژهەمى رەخاڤە وێران ، هەر کەرتەکێ رێڤەبرنێ ژ کەرتێ دى وێرانتر و کومباختر بگرە ژ کەرتێ پەروەردە ، تەندروستى ، بەرگرى ، و هەمى کەرتێن دى . سەرەرای ڤان هەمی کێماسی یا ئەم خودانێن ئابورەکێ خراب و نە شەفاف هەرفتینە ژ ئەنجامێ دوو ئیدارەیی و دوو حزبێن چەکدارێن دەستهەلات و بن دیوار و دەرگەهێن جودا جودایێن هەدەردانا داهاتێ کوردستانێ چ بناڤێ راگەهاندنا چ بناڤێ رێکخراوا چ بناڤێ ئاسایشا نیشتیمانی .
هەر ئاڤاهیەک ل سەر بنیاتەکێ شاش و بێ ئەندازەیی بهێتە دروست کرن دێ زوو هەرفینیت خو لبەر بچویکترین هەژاندن و باروڤێ ناگریت ،جهێ مخابنیێ یە کو وەسا دیاردکەت هەرێما کوردستانێ یا بەرەف هەرفاندنێ دچیت ژ ئەنجامێ نە ئەندازیاریەکا دروست و نەبونا گەشە پێدانا مروڤی کو ببنە بەرێ بناغا سیستەمەک و کومەلگەکا ساخلەم ، ئەڤا ئەم ب چاڤ دبینین ژ ڤان بالەخانێن مەزن نە ژێرخانەکە ژ بو کوردستانێ و هەروەسا نە ئاسویەکە بو گەنجێن کوردستانێ ، هەر وێ واتەیێ ددەت کو خو دەرخستنەکا بێ بنەمایە و سپی کرنا پارێ دزی و تالان کرنا کوردستانێ یە ب رێیێن میری و یاسایی .
لەوا یاپێدڤیە حزب و لایەنێن کوردى بناڤ سیاسى ( کو هەرتشتن لێ سیاسى نینن) دەست ژ گوتنا بەردەن و بەرژەوەندیێن خویێن قرێژ بدەنە رەخەکێ و بەرژەوەندیا هاولاتیان بەرچاف وەربگرن ، هەروەسا هێزێن بناڤ خو دزانن ئوپزسیون دڤێت یەک بەرە بن و دگەل ئازارێن جادێدا بژین و هەول بدەن ببنە هێزەک باندور ل سەر ڤێ دەستهەلا گەندەل ، نەبنە تەمامکەر و هاریکار پتر نەهامەتی و گەندەلیێ بەرقرار بکەن ، ما هوین نزانن دەریا ئیجە پتر ژ گورستانا تەرمێن گەنجێن ڤى وەلاتى داعویراینە ؟ هەتا کەنگى دێ بێباک بن ژ تەخشان و پەخشانکرنا سەرئەرد و بن عەرد و ئەسمانی وەلاتى بو خو ؟
گوتنا دوماهیێ دێبێژم ، بەندکی زولمێ هەرچەند ستویر بیت دی هەر پرچیت .
