هێشت هاڤینە، گەرم د پلێن بڵند دایە، لێ چ دەم نەمایە کو پلێن گەرمێ ب ڕۆژ ژی داکەڤن و سڕ و سەرما ل سەر گشت وەڵاتی دا بێت، حکومەت وەک کارێ هەمیشەیی یا بێ خەم و خەیاڵە، سەرما بیت یان گەرم چ ژ پێدڤیێن ڤان هەر دوو وەرزان د دابینکری نینە.
ژ ترسا ساڵێن بوری د نها دا کار لسەر برینا دارستانان دهێتەکرن ژ بۆ مەرەما خۆ گەرمکرنێ، دگەل کو هندەک کەسێن کۆرەفام ژی کارێ بازرگانیێ ب بڕینا داران دکەن، خەلک هند جاران نەچار دبیت جانێ خۆ ژ سەرما زڤستانێ ب پارێزیت چونکی نەفتا سپی ل وەڵاتێ نەفتێ ژ خەلکی بویە حەسرەت لەورا نەداری و بێ نەفتی بەرێ وان ددەتە برینا داران.
ئەڤڕۆ د ناڤا ڤی تۆخیبێ بچیکێ ب ناڤێ هەرێما کوردستانێ ب دەهان ڕێکخراوێن ژینگەهـ پارێزیێ کار دکەن، وەک ددەن دیار کرن وان مەرەم پێ پاراستنا ژینگەها وەڵاتیە دگەل کو د ساڵێن بوری دا چ ژ کارێ وان یێ پیرۆز بەرچاڤ نەبوویە ب تنێ چەند وێنەکێن فەیسبوکی یێن ژ بۆ بدەستڤەئینانا بودجێ هەیڤانە و ساڵانە نەبیت، و دگەل هەبوونا ڤان ڕێکخراوان چەندین کۆمێن ژینگەهپارێزیێ ژی هەنە کو ژ گەنجێن هشیار پێکدهێن، لەورا هێشتا دەم لبەر دەست کار بکەن بۆ فشار ئێخستنە سەر حکومەتێ ژ بۆ پێدان و بەرهەڤکرنا پێدڤیێن خۆ گەرمکرنێ بۆ زڤستانێ و د هەمان دەم دا هەوێن هشیاریێ ب ڕێکا سوشیاڵ میدیایێ بدەن دەستپێکرن و ب ڕێکێن زانستی و ب کورتی ژ بۆ خەلکی گرنگیا پاڕاستنا ژینگەهێ بدەنە دیارکرن.
بلا گشت ڕێکخراوێن پاراستنا ژینگەهێ یێن ل هەرێما کوردستانێ ب هەڤکاری دگەڵ ڕێکخراوێن ئەوروپا و ئەمریکا ڕونشتنان بکەن و ل سەر پەیڕەوەکێ ئێک گرتی بۆ هێلانا دارستان و ژینگەها کوردستان ڕێک بکەڤن و ئەنجامێن وان ڕێککەفتنان ب دەنگێ بڵند بکەنە د گۆهێن دەستهەڵاتداریا هەرێما کوردستانێ دا.
پاڕاستنا ژینگەهێ ب رامانا پاڕاستنا مرۆڤایەتیێ دهێت، لەورا وەرن دا مرۆڤایەتیێ بپارێزین، و دارستنا سەرمایا مەزن یا ڤێ هەوار پاڕاستنێ یە
