زێدەبوونا ترۆمبێلان گەفە ل سەر ژینگەهێ

ئەگەر گەریانەکا سەر پێ د ناڤا بازارێن دهۆکێ دا بکەی دێ بینی کو هژمارا ترۆمبێلان هندا زێدە بووی، مرۆڤ ب ئاسانی نەشێت دەربازی ئالیێ دیتر یێ جادەیێ ببیت، لێ ئەگەر ب چاڤەکێ زانستیانە لێبنێرین دێ بینین کو هژمار د بلندبوونەکا نەچاڤەرێکری دایە، ژ بەر کو ڕۆژانە ژ لایێ کۆمپانیێن تایبەتڤە ترۆمبێل دهێنە د ناڤا بازارێن کوردستانێ و ئێدی جادەیان ژی شیانێن ڕاگرتنا ڤێ هژمارا زێدە نینە. ڕێڤەبەریا گشتی یا هاتن و چوونا هەرێمێ دایە دیارکرن کو ل هەر چار پارێزگەهین هەرێمێ ملیۆنەک و 985 هزار و 727 ترۆمبێل هەنە، ئەڤە و زێدەباری وێ هژمارا زێدە یا ترۆمبێلان کو وەڵاتیێن ناڤەراست و ژێریا عیراقێ ژی ئیناینە ناڤا هەرێمێ. ژ بلی کێم شیانا هەرێمێ د ئاست چێکرنا جادەیێن نوو دا، د هەمان دەمدا هەبوونا ڤێ هژمارا زێدە مەترسیە لسەر رەوشا ساخلەمی و ئابووری یا وەڵاتێ ژی. د. ئەمین کالۆ ماموستایێ زانینگەها زاخۆ دنڤیسیت: ئێکەم ئۆکسیدێ کاربوون گازەکە ژ ئەنجامێ نەسۆتنا تمام یا سۆتەمەنیان پەیدا دبیت، گازا ئێکەم ئۆکسیدێ کاربوون گازەکا بێ رەنگ و بێ بێهنە و ژ گزۆزێ ترۆمبێلان دەردکەڤیت کو ئێکە ژ مەترسیدارترین گازێن ژەهراوی. لەورا ئەگەر ڤێ مەترسیا لسەر ساخلەمیا مرۆڤان و وێ زێدەگاڤیا د زێدەبوونا هژمارا ترۆمبێلاندا بدەینە بەرچاڤ دێ بینین کو هەرێم دڤێت کار ژ بۆ زێدەکرنا ترۆمبێلێن هێلێن گشتی یێن رێڤینکان وەک پاس و مینی پاس و چێکرنا میترۆ و هێلێن شەمەندەفرێ بکەت و ب یاسا ڕێک ل زێدەبوونا ڤێ هژمارا ترۆمبێلا بگرن دا کو هەم گیانێ مرۆڤی و هەم ژی ژینگەهـ یێن پاراستی بن